Беларускія мытнікі знайшлі ў пасылцы з-за мяжы нацысцкі сцяг
Чырвоны сцяг з чорнай нацысцкай сімволікай у цэнтры знайшлі супрацоўнікі мытні "Мінск-2" пры кантролі міжнароднага паштовага адпраўлення. Пасылка на адрас жыхара Віцебска прыйшла з Украіны.
Мінская абласная экспертная камісія прызнала гэтую інфармацыйную прадукцыю праявай экстрэмізму. З улікам экспертызы мытня затрымала сцяг з нацысцкай сімволікай. Матэрыялы справы былі накіраваныя ў суд Кастрычніцкага раёна Мінска.
Як паведамляе сайт мытні, за 2016 год мытня "Мінск-2" выявіла сем спробаў перасылкі з-за мяжы прадметаў, аднесеных да праяваў экстрэмізму. За 2017 год такіх пасылак выяўлена ўжо 10. Гэта стыкеры, магніты, значкі, запальніцы, халодная зброя ды іншыя прадметы, якія змяшчаюць інфармацыйныя праявы экстрэмізму.
