Ціханоўская заклікае Польшчу падтрымаць еўрапейскі выбар Беларусі
Святлана Ціханоўская і Адам Шлапка / прэс-служба Ціханоўскай
Святлана Ціханоўская заклікае Польшчу падтрымаць еўрапейскі выбар Беларусі. Гаворка пра гэта ішла на сустрэчы з міністрам па еўрапейскіх справах Польшчы Адамам Шлапкам.
У перамовах удзельнічалі таксама прадстаўнікі Аб’яднанага пераходнага кабінета Валерый Кавалеўскі і Павел Латушка.
Падчас сустрэчы абмяркоўвалася супрацоўніцтва ў межах старшынства Польшчы ў Савеце Еўрасаюза. Падрыхтоўка да гэтага пачалася ўжо цяпер. Ціханоўская папрасіла міністра зрабіць Беларусь адным з прыярытэтаў падчас польскага старшынства ў 2025 годзе.
Таксама яна звярнула ўвагу на практыку "вольнага крэсла": на міжнародных мерапрыемствах Беларусь не прадстаўляе ніхто, яе месца пустуе. На думку беларускай лідаркі, у еўрапейскія структуры і на мерапрыемствы варта запрашаць дэмакратычныя сілы, каб голас беларусаў быў пачуты.
