Да расійскай праваабаронцы Яньшынай на Акрэсціна 6 дзён не пускаюць адваката
Кацярына Яньшына / t.me/polniypc
Шэсць дзён на Акрэсціна не пускаюць адваката да расійскай журналісткі і праваабаронцы Кацярыны Яньшынай, паведамляе "Мемарыял".
Дзяўчыне дагэтуль не змаглі перадаць рэчы — праз кавідныя абмежаванні і "распараджэнні начальства".
Па словах калег затрыманай, спярша супрацоўнікі ІЧУ на Акрэсціна адмаўлялі, што Яньшына знаходзіцца ў іх. "Потым апраўдвалі адмову тым, што ўсе следчыя кабінеты занятыя. Некалькі разоў яны прызначалі новы час для наведвання, але кожны раз у выніку пераносілі. Адвакату так і не ўдалося трапіць у ІЧУ", — піша "Мемарыял".
Як распавядала Еўрарадыё, Яньшына прыехала ў Беларусь назіраць за судом над праваабаронцамі "Вясны". У першы ж дзень, 6 студзеня, яе затрымалі пасля працэсу на выхадзе з залы суда. Дзяўчыну асудзілі на 15 сутак, абвінаваціўшы ў дробным хуліганстве (арт. 19.1 КаАП). Па словах судовых прыставаў, яна рабіла фота і вяла прамую трансляцыю з суда.
