Генпракуратура знайшла ў Крупскім раёне палі кукурузы пад снегам
Кукуруза пад снегам / "Беларусь 1"
Некалькі заснежаных палёў з непрыбранай кукурузай выявіла Генпракуратура ў Крупскім раёне. Як паведамляе прэс-служба ведамства, плошча толькі аднаго з іх — каля 35 гектараў.
Палі былі перададзеныя мясцоваму агракамбінату "для стварэння трывалай кармавой базы і забеспячэння збожжам вытворчых участкаў для вырошчвання птушкі".
Кіраўнік вытворчага ўчастка сельгаспрадпрыемства Павел Казакевіч у каментары для дзяржаўнага тэлеканала "Беларусь 1" патлумачыў, што своечасова сабраць ураджай перашкодзілі ўмовы надвор'я. Па яго словах, палі размяшчаюцца ў нізіне, таму глеба аказалася празмерна вільготнай для тэхнікі. "Чакалі прымарозкаў для таго, каб зайсці", — кажа Казакевіч.
У Генпракуратуры абяцаюць даць прававую ацэнку дзеянням службовых асоб і разгледзець пытанне пра кампенсацыю прычыненай шкоды.
