Грамадзян Беларусі, асуджаных за "экстрэмізм", змогуць пазбаўляць грамадзянства
Аляксандр Лукашэнка хоча пазбаўляць грамадзянства сваіх апанентаў / facebook.com/dw.russian
Грамадзян Беларусі, асуджаных за "экстрэмізм", змогуць пазбаўляць грамадзянства. 5 студзеня Аляксандр Лукашэнка падпісаў закон, які ўносіць змены ў закон "Аб грамадзянстве Рэспублікі Беларусь". Самае галоўнае новаўвядзенне гучыць наступным чынам: "Прадугледжана таксама магчымасць страты асобай беларускага грамадзянства, набытага па нараджэнні, у сувязі з наяўнасцю прысуду суда Беларусі, які ўступіў у законную сілу, які пацвярджае ўдзел гэтай асобы ў экстрэмісцкай дзейнасці або прычыненне ім цяжкай шкоды інтарэсам Беларусі, калі такая асоба знаходзіцца за яе межамі".
Гэтыя змены заканадаўства накіраваны супраць апанентаў улады, палітэмігрантаў, якія знаходзяцца ў недасягальнасці для сілавых структур РБ. Спачатку іх пачалі судзіць завочна, канфіскоўваць маёмасць, далей будуць пазбаўляць беларускага грамадзянства.
Таксама закон патрабуе, каб беларусы паведамлялі ў "кампетэнтныя органы" аб наяўнасці ў іх грамадзянства замежнай дзяржавы, віда на жыхарства ў замежнай краіне альбо дакумента, які дае ім там права на атрыманне льготаў.
Сцвярджаецца, што ўведзеныя змены патрэбныя для "забеспячэння нацыянальнай бяспекі". Яны пачнуць дзейнічаць летам 2023-га.
