Арганізатары адмовіліся праводзіць сёлета Марафон салідарнасці з палітвязнямі

Сёлета анлайн Марафона салідарнасці ў падтрымку палітвязняў не будзе. Пра гэта партнурам па мінулай акцыі паведаміла каманда Вольгі Гарбуновай.

Гарбунова паведаміла, што яна з камандай "21 траўня" "прыняла цяжкае рашэнне паставіць марафон на паўзу". Гэтае рашэнне яна тлымачыць поўнай адсутнасцю маральных і часавых рэсурсаў на правядзенне акцыі.

"Мы недаацанілі ўздзеянне на нас саміх гэтых падзей, якія забралі і без таго абмежаваныя валанцёрскія сілы. Мы недаацанілі дзеянні сілавікоў, што прывяло да скарачэння партнёраў ад СМІ і медыя. Нам трэба час пераасэнсаваць тое, што адбылося, зрабіць высновы і работу над памылкамі і, магчыма, прапанаваць вам новы фармат супрацоўніцтва, але ўжо крыху пазней", — кажа Гарбунова.

Марафон салідарнасці з беларускімі палітвязнямі і іх сем'ямі "Нам не ўсё адно", які прайшоў 29-30 ліпеня 2023 года, сабраў больш за 550 тысяч еўра.

У жніўні таго ж года суд у Мінску прызнаў відэазапісы Марафону салідарнасці "экстрэмісцкімі матэрыяламі". А ў кастрычніку на арганізатараў і ўдзельнікаў марафону пачалі крымінальную справу.

Сёлета ў верасні Гарбунова пакінула пасаду прадстаўніцы па сацыяльнай палітыцы Аб'яднанага пераходнага кабінета (АПК).