Колькі зарабляюць лекары ў Беларусі і колькі ў Польшчы — адчуйце розніцу

Беларускія чыноўнікі часта кажуць, што "ў нас сацыяльная дзяржава". Але ці пацвярджаюць гэта даныя аб заробках адной з найбольш запатрабаваных груп спецыялістаў — дактароў? Еўрарадыё параўнала сярэднія заробкі медыкаў у Беларусі і ў Польшчы. Адразу скажам: вынікі далёка не на карысць нашай краіны.

Як паведамлялі газета Wyborcza і партал Money.pl, медыянная зарплата лекараў у Польшчы на пачатак 2024 года складала 17 тысяч злотых (каля 4,2 тысячы долараў па курсе). Гэта значыць, палова медыкаў зарабляе менш за гэтую суму, а палова — больш.

Даныя аб медыянных заробках менавіта лекараў у Беларусі не публікуюцца, аднак сярэдняя зарплата дактароў у сярэдзіне 2024 года ацэньвалася ў 3,2 тысячы рублёў — гэта каля тысячы долараў па курсе на чэрвень. Звяртаем увагу, што медианные заробкі заўсёды ніжэй за сярэднія.

Польскія лекары зарабляюць у разы больш

Яшчэ адзін факт пра заробкі польскіх лекараў: часам за гадзіну працы ім гатовыя плаціць шостую частку месячнага заробку беларускага калегі. Напрыклад, цяпер эндакрынолагу ў Любушскім ваяводстве прапануюць 590 злотых за гадзіну працы, гэта значыць каля 150 долараў.

Заканадаўча ўсталяваны мінімальны заробак лекара па кантракце ў Польшчы складае 10,4 тысячы злотых — больш за 2,5 тысячы долараў. У Беларусі асобнага "мінімуму" для медыкаў няма, агульны мінімальны парог па краіне ў 2024 годзе склаў 626 рублёў — менш за 200 долараў.

Колькі ў Беларусі трэба лекараў?

На 7 снежня ў Дзяржаўнай службе занятасці зарэгістраваны 4481 вакансія для лекараў-спецыялістаў.

Пераважная большасць з іх (4422 вакансіі) прапануюць заробак да 3,4 тысячы рублёў, гэта значыць да тысячы долараў. З іх амаль палова (2048 вакансій) гатовыя плаціць лекарам да 1700 рублёў — гэта да 500 долараў у эквіваленце.