"Крынж" ці "топ": погляд сямікласніка на самыя незвычайныя школьныя рэчы

Мы разгледзелі асартымент анлайн-крам і расказваем пра самыя незвычайныя (і дзіўныя) штукі, якія дзецям прапануюць узяць у школу.

І папрасілі сямікласніка Марка паглядзець на гэты спіс і выбраць тое, што ён зацаніў бы, убачыўшы гэта ў сваіх аднакласнікаў.

Пенал для спісвання

Самы звычайны нейлонавы пенал за 9 рублёў. Настолькі нудны, што воку няма за што зачапіцца. Але! Аказваецца, з такім пеналам вельмі зручна спісваць. Можна пакласці ў яго шпору або тэлефон, запэўнівае прадавец, і ўсе кантрольныя пройдуць гладка.

— А, празрысты? Так, я б узяў.

Падстаўка пад кніжкі

Вытворца кажа, што купляючы такую падстаўку, бацькі дбаюць пра зрок і паставу дзіцяці. У яе сем вуглоў нахілу і чытаць так нашмат зручней, чым штудзіраваць кніжку, схіліўшыся над ёй. Каштуе крыху больш за 9 рублёў.

— Так, з такой падстаўкай значна ямчэй, — пагаджаецца Марк. — Можна браць.

Мільён кітайскіх і карэйскіх заплечнікаў

На сайце папулярнага беларускага рытэйлера проста процьма ружовых і бэзавых заплечнікаў. А ўнутры бэзавага заплечніка — бэзавы шоппер, бэзавы мяшочак для абутку, бэзавы пенал, бэзавая сумка цераз плячо. І яшчэ куча цацак і значкаў, прышпіленых да заплечніка з усіх бакоў.

"Карэйскі стыль заплечніка дазваляе падкрэсліць індывідуальнасць і добры густ яго ўладальніка. Увесь набор вытрыманы ў модным бэзавым колеры з устаўкамі незвычайнага рознакаляровага тэкстылю", — гаворыцца ў апісанні.

— Нешта мне не вельмі падабаецца. Можа камусьці і спадабаецца, а я ненавіджу гэтыя ружовыя адценні, — кажа Марк.

А вось іншы заплечнік ад беларускага брэнда "Vokladki" Марку спадабаўся — і прынтом, і формай. 

Вердыкт: "Топ".

Пенал з капібарамі

Побач з ружовымі кітайскімі заплечнікамі — мільён кітайскіх пеналаў. Яны таксама бываюць ружовымі, ліловымі... Але позірк Марка зачапіўся за пенал з капібарамі.

"Прыкольны прынт з мілай капібарай спадабаецца і першакласнікам, і падлеткам", — абяцаюць у апісанні да пенала.

— О, так, капібара! Добры пенал, можна браць, — рэзюмуе Марк.

Мы не ведаем, хто расказаў беларускім школьнікам пра капібараў, але іх рэальна ўсе любяць.

А гэты пенал-каціная лапка атрымаў жорсткі вырак.

"Зручны, мяккі пенал выкананы ў стыльным дызайне з трэндавы малюнкам і мае адно ёмістае аддзяленне на маланцы. Матэрыял: штучнае футра", — гаворыцца ў апісанні.

— Гэта крынж. Не, гэта дакладна крынж.

Сімпатычная канцылярка

Мы перагледзелі мноства ручак, закладачак, гумак (напрыканцы трэцяй гадзіны на сайтах анлайн-рытэйлераў карэспандэнт Еўрарадыё вырашыла сабраць пенальчык і для сябе). Марк выбраў некалькі прадметаў, якія падаюцца яму сімпатычнымі.

— Гумкі з катамі прыкольныя, я б такія паклаў у пенал. Калькулятар-лінейка таксама выглядае добра, карысная штука.

О, а гэта ручкі, якія можна сціраць? Окей, так, вось што-што, а гэта — вельмі патрэбнае.