Крывушэнка адрэагаваў на інтэрв’ю Дулуба Еўрарадыё
Галоўны трэнер зборнай Беларусі па футболе Ігар Крывушэнка адрэагаваў на інтэрв’ю галоўнага трэнера “Карпатаў” Алега Дулуба Еўрарадыё. Дулуб выказаўся наконт таго, што Крывушэнка сумяшчае пасаду ў зборнай і ў “Тарпеда-БелАЗ”. “На двух крэслах усядзець нельга — звалішся і з першага, і з другога. Гэта я выразна зразумеў”, — сказаў футбольны спецыяліст.
Крывушэнка ў чацвер падчас прэс-канферэнцыі заявіў, што не адчувае страты раўнавагі. “Я адчуваю, што спадар Дулуб нацэліўся на адно з гэтых крэслаў”, — сказаў галоўны трэнер зборнай Беларусі.
9 чэрвеня на “Барысаў-Арэне” футбольная зборная Беларусі правядзе адборачны матч чэмпіянату свету з Балгарыяй. Пачатак у 21.45.
