Лідар “Правага сектара” прызначаны дарадцам начальніка Генштабу Украіны

Лідар “Правага сектара” Дзмітрый Яраш прызначаны дарадцам начальніка Генеральнага штабу ўзброеных сіл Украіны, паведамляе УНІАН. У часе сустрэчы з кіраўніком Генштабу Віктарам Мужэнкам, Яраш дамовіўся пра фармат супрацоўніцтва Добраахвотніцкага Украінскага Корпуса з Узброенымі сіламі.

Кіраўнік Генштабу адзначыў істотны ўнёсак усіх добраахвотніцкіх батальёнаў у агульную справу абароны Украіны ад агрэсіі з усходу. Паводле яго словаў, байцы ДУК у многіх баях годна выявілі высокую матывацыю і баявы дух, а іх досвед і веды будуць працаваць на развіццё ўсяго ўкраінскага войска.

У сваю чаргу Яраш падкрэсліў, што адзінства з’яўляецца ключавой умовай далейшай паспяховай барацьбы і выказаў гатовасць адбудоўваць узаемадзеянне і інтэграцыю добраахвотніцкіх батальёнаў ва ўзброеныя сілы Украіны. Ён запэўніў, што ДУК гатовы падпарадкоўвацца кіраўніцтву войска ў пытаннях абароны дзяржавы ад знешняга ворага.