Лукашэнка прывёў на хакей сабаку, а гэта забаронена
Шпіц Умка на трыбуне / Прэс-служба Аляксандра Лукашэнкі
Аляксандр Лукашэнка прывёў на хакей сабаку. Шпіц Умка сядзеў побач з ім на трыбуне падчас матчу чэмпіянату Мінска па хакеі сярод аматарскіх каманд. Нібыта Лукашэнка "пасля ўласнай трэніроўкі застаўся паглядзець і пазаўзець".
Адбылося гэта на мінскай "Алімпік Арэне". "Зеркалу" ў службе аховы спартыўнага комплексу сказалі, што з жывёлай яны заўзятара не прапусцяць. Праўда, ва ўнутраных правілах арэны такія выпадкі не згадваюцца. Забарона ж ёсць у Правілах утрымання хатніх сабак і катоў у населеных пунктах. Яны забараняюць заходзіць з жывёламі на тыя ж стадыёны. Выключэнне ёсць толькі для сабак-павадыроў. Зразумела, што да адміністрацыйнай адказнасці Лукашэнку ніхто не прыцягне. А калі б паспрабавалі, ён заўсёды можа назваць Умку "павадыром".
