Макей распавёў пра перамовы, якія Беларусь вядзе з ЗША

На мінулым тыдні амерыканскі часопіс Foreign Policy паведаміў пра тэлефанаванне ў Дзярждэпартамент ЗША міністра замежных спраў Беларусі Уладзіміра Макея. Ён паведаміў, што абмежаванні на колькасць амерыканскіх дыпламатаў у Мінску знятыя. МЗС пацвердзіў інфармацыю пра размову Макея з кіраўніцтвам Дзяржаўнага дэпартамэнту ЗША. І іх было некалькі. Аднак дэталі не раскрываюцца.

Як інфармуе БЕЛТА, Уладзімір Макей заявіў, што Беларусь зацікаўленая развіваць нармальнае супрацоўніцтва з ЗША. Ён адзначыў, што Злучаныя Штаты — гэта вялізны рынак для беларускіх тавараў. Міністр прыгадаў часы, калі Вашынгтон уводзіў санкцыі ў дачыненні Беларусі і падкрэсліў, што Мінск быў вымушаны на іх адказаць. Але цяпер настаў час перагледзець тыя састарэлыя догмы, якія былі ў двухбаковых адносінах, сказаў Макей.

Міністр замежных спраў распавёў, што дыялог з ЗША ідзе на розных узроўнях. Стаіць задача пашырыць "пазітыўную атмасферу ў супрацоўніцтве". "Абедзьве краіны павінны быць прадстаўлены на ўзроўні амбасадараў, павінны мець нармальныя палітычныя і эканамічныя кантакты, дачыненні", — адзначыў Уладзімір Макей.