Міністр паскардзіўся, што яго словы ўспрымаюць "як папулісцкія выказванні"
![Аляксандр Кулік (злева) на нарадзе](/sites/default/files/styles/gallery_main/public/2024-07/kulik.jpg.webp?itok=tymLnGUX)
Аляксандр Кулік (злева) на нарадзе / t.me/minleshoz/
Міністр лясной гаспадаркі Аляксандр Кулік паскардзіўся, што некаторыя падначаленыя яго словы ўспрымаюць "як папулісцкія выказванні". Ён абвінаваціў у сабатажы "некаторых дырэктараў" лясгасаў.
2 ліпеня прайшла вытворчая нарада, на якой выступіў Кулік. Ён гаварыў пра заробкі рабочых. Па словах міністра, былі павялічаны заработныя платы дырэктараў лясгасаў, дадзены даручэнні павялічыць заробкі ляснічым (пры ўмове выканання і тымі, і іншымі ўсіх вытворчых паказчыкаў). "А што з рабочымі? — спытаўся Аляксандр Кулік. — ...Падобна на тое, што некаторыя дырэктары ўспрымаюць мае словы як папулісцкія выказванні. Але гэта не так. Так, заработная плата павінна быць заробленай. Але яна павінна быць годнай".
У канцы ліпеня ў Мінлясгасе пройдзе нарада, прысвечаная сітуацыі з заробкамі рабочых.
У пачатку лета падчас наведвання Пружанскага раёна Куліком рабочыя прасілі яго падняць заробкі. І ён пагаджаўся, што іх трэба падымаць. А цяпер высветлілася, што дырэктары лясгасаў яму не паверылі і павышэннем заробкаў рабочых не займаліся.
![Міністр паскардзіўся, што яго словы ўспрымаюць "як папулісцкія выказванні"](/sites/default/files/styles/default_image_paragraph/public/paragraphs/image/334_21.jpg.webp?itok=hVUTHRFl)
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.