Мінздароўя скарачае "кавідныя" даплаты медыкам
Міністэрства аховы здароўя скарачае "кавідныя" даплаты медыкам. Гэтая мера ўзгодненая афіцыйнымі прафсаюзамі.
"Міністэрства аховы здароўя (па ўзгадненні з рэспубліканскім камітэтам Беларускага прафсаюза работнікаў аховы здароўя) адкарэктавала падыходы да ўстанаўлення надбаўкі за працу ва ўмовах інфекцыі COVID-19 з улікам эпідэміялагічнай абстаноўкі, узроўню захворвання і вакцынацыі работнікаў аховы здароўя", — гаворыцца ў афіцыйным паведамленні.
Новаўвядзенне набывае моц 1 жніўня.
Раней медыкам плацілі даплаты, калі ён працаваў з хворымі на COVID-19 больш за траціну свайго працоўнага часу. Цяпер даплаты будуць ісці толькі за тыя дні, калі ў медыка была праца з кавіднымі хворымі.
У Мінздароўя заяўляюць, што сёлета на "кавідныя" даплаты было накіравана 589,4 мільёна рублёў з бюджэту. За травень 2021-га гэтыя выплаты атрымалі амаль 69 тысяч работнікаў аховы здароўя.
