На Дзень роднай мовы ў Пружанах паказалі батлейку пра злога пана (фота)

Псалмы спяваў праваслаўны гурт, а дзеці-каталікі паказалі батлейку пра злога пана і няшчасны народ
Гурт “Амафор” у складзе юнака і дзвюх жанчын праспяваў сем беларускамоўных псалмоў. Завяршыў свой выступ гімнам “Магутны Божа”. Спектакль “Дудка-самагудка”  доўжыўся каля гадзіны. Адна з арганізатарак  вечарыны, актывістка Таварыства беларускай мовы Тарэса  Жэгалава  патлумачыла:

“Гурт “Амафор” — яны самі патэлефанавалі мне. “А каб перад вамі выступіць са сваімі песнямі?” Мы і прапанавалі: “А давайце на Дзень мовы”. Гэта праваслаўныя. А спектакль паставілі школьнікі. Яны з многіх школ горада. Яны з каталіцкай абшчыны”.

Спектакль  брэсцкай паэткі і драматурга Зінаіды Дудзюк увасабляе распаўсюджаную ў беларускай літаратуры фабулу барацьбы народа супраць злога пана і ягоных наймітаў.  Пан  хоча выкарыстаць чароўную дудку, каб усе пад яе скакалі.

У гарадскі Дом культуры прыйшло каля ста цікаўных. Прысутныя  таксама не засталіся пасіўнымі гледачамі. Па раздадзеных цэтліках яны развучылі  малітву за Беларусь і праспявалі яе разам у канцы сустрэчы. Усе — і малыя, і дарослыя — атрымалі святочны каравай.