На Эльбрусе ратуюць турыстаў з Беларусі
Ратавальнікі Кабардзіна-Балкарыі / t.me/mchskbr/
На Эльбрусе ратуюць турыстаў з Беларусі. Пры спуску з вышыні 5300 метраў група з 5 чалавек (чацвёра беларусаў і адзін грамадзянін Расіі) паведаміла, што ёй патрэбна дапамога. Двум яе ўдзельнікам стала дрэнна.
Здарэнне адбылося ўвечары 11 ліпеня. Як паведамляюць ратавальнікі Кабардзіна-Балкарыі, пакуль група працягвала спуск, з ёй падтрымлівалася сувязь. 8 ратавальнікаў на 2 адзінках спецтэхнікі сустрэлі беларускіх турыстаў. На вышыні 3000 метраў яны будуць чакаць раніцы, калі працягнуць спуск. МНС РФ паведамляе, што пацярпелыя ў здавальняючым стане.
Адзначаецца, што турыстычная група не была зарэгістраваная.
Папярэдні раз беларускіх турыстаў ратавалі на Эльбрусе ў траўні. Эльбрус — найвышэйшая вяршыня РФ (5642 метры над узроўнем мора), знаходзіцца на Паўночным Каўказе, на мяжы Кабардзіна-Балкарыі і Карачаева-Чаркесіі.
