На “Нафтане” знайшліся загадкавыя балоны, якія засталіся ад будаўнікоў завода

14 жніўня падчас будаўнічых работ на тэрыторыі нафтаперапрацоўчага завода ў Наваполацку адкапалі балоны з невядомым змесцівам. Ахова НПЗ і выратавальнікі тэрмінова вывезлі іх з прадпрыемства.

На заводе Еўрарадыё распавялі, што балоны, якія адкапалі падчас будаўнічых работ, аказаліся пустымі. Мяркуецца, што іх выкарыстоўвалі зваршчыкі, калі будавалі НПЗ. 

“Некалькі дзясяткаў гадоў праляжалі балоны, — адказаў намеснік генеральнага дырэктара ААТ “Нафтан” па сацыяльным развіцці Сяргей Яўтушык. — Хутчэй за ўсё, з моманту будаўніцтва завода. Падобны на тыя, з якімі працуюць зваршчыкі, але дакладна нельга сказаць. Няма ніякіх апазнавальных знакаў. Магчыма, пры будаўніцтве завода іх нехта выкінуў.

Спецыялісты МНС у спецыяльных касцюмах вывезлі ржавыя балоны, пад вадзяной заслонай іх адчынілі. Балоны аказаліся пустымі”.

Знойдзеныя балоны пойдуць на металалом, бо не нясуць гістарычнай каштоўнасці.

Будаўніцтва “Нафтана” пачалося ў 1958 годзе. Прадпрыемства з’яўляецца горадаўтваральным для Наваполацка, які пачалі будаваць пазней. “Нафтан” — адно з двух нафтаперапрацоўчых прадпрыемстваў Беларусі.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.