Палата лордаў Вялікабрытаніі не зацвердзіла законапраект аб "брэкзіце"
Палата лордаў брытанскага парламента не зацвердзіла законапраект аб "брэкзіце", хаця палата абшчынаў раней падтрымала яго.
Падчас абмеркавання закону 358 чальцоў палаты лордаў прагаласавалі за тое, каб дадаць у дакумент пункт, які дазваляе грамадзянам Еўрасаюза жыць і працаваць у Брытаніі пасля яе выхаду з ЕС, перадае Бі-Бі-Сі. Супраць прагаласвалі 256 чальцоў палаты. Ініцыятыва была прынятая большасцю галасоў, а гэта азначае, што законапраект зноў адправіцца на разгляд у палату абшчын. Зрэшты, ніжняя палата брытанскага парламента можа адмовіцца ўносіць у закон гэтыя папраўкі.
Прэм'ер Брытаніі Тэрэза Мэй заклікала лордаў прыняць дакумент без паправак. Пакуль закон не прыняты, Вялікабрытанія не можа прывесці ў дзеянне рашэнне аб выхадзе краіны з ЕС, прынятае на рэферэндуме. Рашэнне палаты лордаў адкладае прыняцце закона як мінімум на два тыдні. Раней Тэрэза Мэй абяцала запусціць працэс выхаду з Еўрасаюза да канца сакавіка.
Законапраект быў унесены ў парламент пасля рашэння брытанскага Вярхоўнага суда, які пастанавіў, што ўраду трэба згода заканадаўцаў для фармальнага запуску перамоваў з Бруселем аб выхадзе з ЕС.
