Памёр беларускі мастак Алесь Родзін

19 снежня ва ўзросце 75 гадоў памёр мастак Алесь Родзін. Яго сябры напісалі ў Фэйсбуку: "Алесь Родзін памёр. Цяжка, балюча, змрочна. Ён быў Космас".

Алесь Родзін нарадзіўся ў 1947 годзе ў Баранавічах. Скончыў Беларускі дзяржаўны тэатральна-мастацкі інстытут (цяпер Беларуская акадэмія мастацтваў).

Родзін быў адным з самых вядомых прадстаўнікоў беларускага авангарду, працаваў у сферах эксперыментальнага жывапісу і перфомансу. Ён быў шырока вядомы на Захадзе, больш за дзесяць гадоў быў рэзідэнтам Берлінскага Дома мастакоў Tacheles, дзе экспанаваліся ягоныя працы. У Мінску Родзін быў адным з арганізатараў міжнароднага фэсту эксперыментальнага мастацтва "Дах".