Памёр вядомы артыст Расціслаў Янкоўскі
26 чэрвеня памёр Народны артыст СССР Расціслаў Янкоўскі. Пра гэта паведамляецца на сайце Нацыянальнага акадэмічнага драматычнага тэатра імя Максіма Горкага, артыстам якога быў Янкоўскі.
"Вялікі акцёр заўсёды будзе жыць у ролях, бліскуча сыграных ім, а добры і шчыры, адкрыты і светлы, унікальны, мужны чалавек — назаўжды застанецца ў сэрцах родных і сяброў, у памяці мільёнаў людзей, для якіх ён быў, ёсць і будзе кумірам", — гаворыцца ў паведамлені адміністрацыі тэатра.
Развітанне з артыстам пройдзе 28 чэрвеня ў 10.00 на Вялікай сцэне тэатра.
Расціслаў Янкоўскі нарадзіўся 5 лютага 1930 года ў Адэсе. У 1951 годзе ён скончыў Тэатральную студыю пры Ленінабадскім драматычным тэатры. У Мінск ён пераехаў у 1957 годзе і з чэрвеня таго ж года пачаў працаваць у Рускім тэатры.
За сваю акторскую кар'еру Янкоўскі сыграў больш за 160 вядучых роляў у тэатры і больш за 50 — у кіно. Адна з яго апошніх значных роляў — галоўны персанаж у спектаклі "Пане Каханку" паводле п'есы Андрэя Курэйчыка.
У 1978 годзе ён быў узнагароджаны званнем Народнага артыста СССР. Акрамя таго Янкоўскі быў таксама заслужаным артыстам Беларускай ССР і Народным артыстам Беларускай ССР. Ён быў адзначаны шматлікімі дзяржаўнымі ўзнагародамі, сярод іх Ордэн Францішка Скарыны і Ордэн Айчыны III і II ступеняў.
