Першы віцэ-прэм'ер абяцае падкарэктаваць указ №222 па працы ІП
![Першы віцэ-прэм'ер абяцае падкарэктаваць указ №222 па працы ІП](/sites/default/files/styles/gallery_main/public/2023-08/turczyn-2502.jpg.webp?itok=qhupL-e9)
Указ № 222 "Аб рэгуляванні прадпрымальніцкай дзейнасці і рэалізацыі тавараў індывідуальнымі прадпрымальнікамі і іншымі фізічнымі асобамі" будзе адкарэктаваны. Пра такія планы ўрада паведаміў у праграме "Галоўны эфір" на тэлеканале "Беларусь 1" першы намеснік прэм'ер-міністра Аляксандр Турчын.
"Трошку або нават не трошку", — так абазначыў чыноўнік планы наконт карэктавання ўказа.
Указ №222 пачаў дзейнічаць са студзеня 2016 года. Згодна з ім, індывідуальныя прадпрымальнікі, якія гандлююць імпартнымі таварамі лёгкай прамысловасці, абавязаныя абзавесціся суправаджальнымі дакументамі.
ІП просяць улады ўвесці мараторый на падачу поўнага пакета дакументаў, неабходнага паводле ўказа. Таксама яны прапануюць навесці парадак у дакументаабароце ў Расіі. Калектыўны зварот, пад якім падпісаліся амаль 7000 чалавек, прадпрымальнікі перадалі кіраўніку дзяржавы ў студзені.
"Мы з Міністэрствам па падатках і зборах зробім агульны парадак. Ёсць таварна-транспартныя накладныя і іншыя дакументы, якіх цалкам дастаткова, каб правяраць легальнасць увозу тавару на тэрыторыю нашай краіны", — паведаміў Турчын.
Абмеркаваць гэтае пытанне з прадстаўнікамі бізнэсу плануецца на пасяджэнні Савета па развіцці прадпрымальніцтва 27 лютага.
Завяршыць працу над зменамі ва ўказ плануецца ў першай палове 2019 года.