Плюс 38%! Вось як змяніліся цэны на навучанне ў ВНУ Беларусі за тры гады

12/06/2024 - 15:35

Як мяняліся цэны на навучанне ў ВНУ? / BNTU

Беларускія выпускнікі здаюць экзамены і рыхтуюцца да паступлення — і прыблізна палова з іх пойдзе на платнае аддзяленне. Гэта нятанная радасць, ды і цэны растуць штогод.

Еўрарадыё паглядзела, як моцна выраслі цэны на навучанне ў беларускіх універсітэтах за апошнія некалькі гадоў.

БДУ

У галоўнай ВНУ краіны і цэны на навучанне самыя высокія.

Напрыклад, першы курс на спецыяльнасці "Міжнароднае права" ў 2023/2024 годзе каштаваў 5956 рублёў. Столькі ж каштавалі некалькі кірункаў на юрфаку.

За год да таго "Міжнароднае права" каштавала на 400 рублёў менш, у 2021/2022 — 5061 рубель, а ў 2020/2021 — 4660 рублёў. За тры гады навучанне тут падаражэла на 27%.

У залежнасці ад факультэтаў цэны адрозніваюцца. Напрыклад, у 2023/2024 навучальным годзе 3754 рублі каштавалі беларуская і руская філалогія на філфаку, а фундаментальная фізіка на фізфаку — 4262.

У сярэднім плата за навучанне ў БДУ дадае 400-500 рублёў штогод.

БНТУ

У мінулым навучальным годзе вучыцца на першым курсе тут каштавала ад 4704 да 5017 рублёў.

Напрыклад, спецыяльнасць "Архітэктурны дызайн" у 2023/2024 годзе каштавала 5017 рублёў, у 2022/2023 — 4689 рублёў, у 2021/2022 — 4263 рублі, а ў 2020/2021 — 3875 рублёў. Падаражэнне за тры гады склала 29%.

Ужо ў новым навучальным годзе планка для некаторых студэнтаў БНТУ, хутчэй за ўсё, пераваліць за 5500 рублёў.

БДУІР

Кузня беларускіх айцішнікаў таксама не з танных. За папярэдні навучальны год кошт павышаўся двойчы.

Так, на факультэце інфармацыйных тэхналогій і кіравання на 1 снежня 2023 плата за навучанне на першым курсе склала 4910 рублёў, а яшчэ ў верасні была амаль на 400 рублёў меншай.

У 2022/2023 навучальным годзе вучыцца было яшчэ танней — 4290 рублёў, у 2021/2022 — 3900 рублёў, а ў 2020/2021 — 3550 рублёў. Тут за тры гады навучанне дадало ў кошце 26%.

БДЭУ

У "наргасе" атрымаць адукацыю можна танней, чым у іншых буйных універсітэтах. На ўсіх факультэтах цана для першакурснікаў са снежня 2023 года складала 3641 рубель.

У 2022/2023 годзе вучыцца было амаль на 500 рублёў танней — 3181 рубель, у 2021/2022 — 2892 рублі і ў 2020/2021 — 2632 рублі. Прыбаўка — 38% за тры гады.

МДЛУ

Першакурснікі большасці факультэтаў "іняза" летась плацілі па 3948 рублёў. За год да таго — 3690 рублёў.

У 2021/2022 цана складала 3360 рублёў, а ў 2020/2021 — 3060 рублёў.

Плюс 29% за тры гады.

Чаму растуць цэны на навучанне

ВНУ павышаюць цэны ў сярэднім раз на год-паўтара. Звычайна кошт расце не больш чым на 10% у год.

У Мінадукацыі тлумачылі, што цэны растуць праз "неабходнасць забяспечыць выплаты заробку выкладчыкам".

Таксама на павышэнне кошту навучання, паводле чыноўнікаў, уплываюць павышэнне цэн на камунальныя паслугі і выдаткі на ўтрыманне будынка. То-бок фактычна дзяржаўныя ўстановы павышаюць цэны паслуг, каб больш плаціць іншым дзяржаўным арганізацыям, якія таксама павышаюць цэны паслуг.