Расійскія блогеры: УСУ ўзялі Ізюм і Ліман
Горад Ізюм пасля абстрэлу расійскімі ракетамі / РИА Новости
Прарасійскія крыніцы пішуць, што УСУ ўзялі Ізюм і Ліман. Па іх інфармацыі, расійскай арміі давялося адступіць, каб пазбегнуць акружэння. Раней з'явіліся паведамленні аб дэакупацыі Купянска — трэцяга па велічыні горада ў Харкаўскай вобласці. Гэта пацвярджае і СБУ.
Ізюм, таксама горад у Харкаўскай вобласці, — яшчэ адно месца з велізарным значэннем для забеспячэння расійскай арміі.
"Украінскія сілы могуць знішчыць расійскія пазіцыі вакол Ізюма, калі перарэжуць наземныя лагістычныя лініі РФ на поўнач і поўдзень ад Ізюма, — адзначалі напярэдадні аналітыкі Амерыканскага інстытута вывучэння вайны. — Калі УСУ атрымаецца гэта зрабіць, яны змогуць стварыць кацёл вакол горада і разбурыць значную частку расійскіх пазіцый на паўночным усходзе Украіны".
Афіцыйнай інфармацыі аб уцёках расійскага войска з Ізюма і Лімана (гэта горад у Данецкай вобласці) ад Генштаба Украіны пакуль не паступала. Крэмль увогуле не каментуе сітуацыю аб украінскім контрнаступе з самага яго пачатку. 8 верасня ўкраінскі сцяг узняўся над вызваленай Балаклеяй, 10-га — над Купянскам.
Калі інфармацыя аб узяцці УСУ Лімана і Ізюма пацвердзіцца, атрымаецца, што за суткі ўкраінскія войскі захапілі вялікі плацдарм на левым беразе Северскага Данца.
