Вольскі і Міхалок сталі "брэндамі года"
Журы конкурсу нечакана пашырыла спіс намінаваных на “Брэнд-персону года”. Да таго на медаль і ганаровае званне прэтэндавалі толькі спартоўцы і поп-выканаўцы.
За дзень да абвяшчэння вынікаў штогадовага конкурсу “Брэнд года” прафесійнае журы раптоўна пашырыла спіс намінантаў на “Брэнд-персону 2012”. Да вылучаных раней эстрадных артыстаў (Ларыса Грыбалёва, Анатоль Ярмоленка, Ядвіга Паплаўская ды Аляксандр Ціхановіч) і знакамітых спартоўцаў (Максім Мірны, Вікторыя Азаранка, Аляксандра Герасіменя) дадаліся пісьменнік Андрэй Жвалеўскі, лідар гурта J:Морс Уладзімір Пугач, лідар “Ляписа Трубецкого” Сяргей Міхалок ды франтмэн “Крамбамбулі” Лявон Вольскі. Інфармацыю пра гэта пацвердзілі Еўрарадыё і сябра журы конкурса Андрэй Язерын.
Пераможцы абвешчаныя 25 студзеня падчас заключнай цырымоніі конкурсу “Брэнд года 2012”. І Сяргей Міхалок, і Лявон Вольскі ўвайшлі ў спіс з 6 найбольш заўважных культурных дзеячаў Беларусі.
"Брэнд-персона" — галоўная намінацыя конкурса "Брэнд года". У спісе леташніх намінантаў на сайце конкурса "брэнд-персоны" пералічаныя першымі.
