У падазроных беспрацоўных патрабуюць даказаць, што ім ёсць, за што есці

120116 Nasta Padatki.mp3

“У падатковай інспекцыі няма ні магчымасцяў, ні жадання сядзець і адсочваць усіх грамадзянаў!” — кажуць у аддзеле кансультацый Інспекцыі па падатках і зборах Маскоўскага раёна Мінска.

Каб праверыць прыбыткі, трэба дзве ўмовы, тлумачыць супрацоўніца інспекцыі. Першая — не працаваць, і другая — зрабіць дарагую пакупку (у асноўным — кватэру або машыну).

Інспекцыя Маскоўскага раёна: “Значыць, была сітуацыя, калі грамадзянін купіў нейкую дарагую маёмасць, на даволі буйную суму. І пры гэтым нідзе не працаваў. У такім разе ў падатковага органа могуць узнікнуць пытанні”.

Еўрарадыё: А калі я нідзе не працую, скажам, ужо 10 гадоў… Жыву так… Але нічога буйнога не купляю, толькі ежу… Мяне не будзеце правяраць? На што я жыву?

Інспекцыя Цэнтральнага раёна: “Не, такіх не правяраем”.

Але, як даведалася Еўрарадыё, падатковая можа запатрабаваць з вас справаздачу не толькі за той год, калі была буйная пакупка, але і за 10 папярэдніх гадоў! (паводле Закона аб дэклараванні).

Інспекцыя Цэнтральнага раёна: “Мы маем права рабіць такія разлікі прыбыткаў і выдаткаў за 10 папярэдніх гадоў ад падачы дэкларацыі. Інспекцыя сама вырашае…”

У падаткавікоў ёсць права спытаць у чалавека, адкуль у яго грошы, параўнаць прыбыткі і выдаткі. І калі сума выдаткаў чалавека перавышае суму прыбыткаў, то падатковы орган мае падставу прад’явіць падатак да выплаты.

Мінчаніна Сяргея, які набыў машыну ў 2010-м годзе, падаткавікі правяраюць ажно з 2003 года! У той час ён нідзе не працаваў, быў студэнтам. Паколькі стыпендыя меншая за пражытковы мінімум, цяпер ён павінен або даказаць, што жыў за грошы родных, або… заплаціць з розніцы падаткі!

Праўда, сума атрымалася зусім невялікая — усяго 1,5 мільёна рублёў за 10 гадоў!

Еўрарадыё запыталася, ці апраўдваюць сябе такія праверкі, бо выдаткаў і сілаў шмат… А паўтара мільёна за перыяд 10 гадоў — гэта амаль нішто.

Інспекцыя Маскоўскага раёна: “Часам бывае, што і не апраўдвае, так… Мы робім сваю працу — у аднаго чалавека такі падатак, а ў іншага будзе нашмат большы… Па-рознаму бывае. Другая фізасоба аплаціць такі падатак, што перакрые ўсё… Мы ж не ведаем папярэдне, калі правяраем, ці будзе ў яго якое перавышэнне і ці будзе ён што плаціць. Мы павінны кожнага праверыць, па кім бачым такую інфармацыю, што ёсць выдаткі, але прыбыткі адсутнічаюць”.