“Шмат чытае. Чакае суда”. Бізнесмен Аляксандр Кныровіч — 8 месяцаў за кратамі
![“Шмат чытае. Чакае суда”. Бізнесмен Аляксандр Кныровіч — 8 месяцаў за кратамі](/sites/default/files/styles/gallery_main/public/2023-08/kny.jpg.webp?itok=kiilKMEV)
Кіраўнік групы кампаній "Сармат-СТІ", адзін з самых “медыйных” бізнесменаў Беларусі Аляксандр Кныровіч правёў за кратамі ўжо 8 месяцаў. Ён быў затрыманы ўвечары 25 студзеня, калі вярнуўся са Швейцарыі. Па адной з версіяў, бізнесмен сам прыйшоў па выкліку ў КДБ.
3 верасня Аляксандр Кныровіч сустрэў за кратамі свой 44-ы дзень народзінаў.
Бізнесмена абвінавачваюць у нясплаце падаткаў. Яго падначаленым выстаўлена абвінавачанне ў дачы хабару. Газета Адміністрацыі прэзідэнта "СБ. Беларусь сегодня" заяўляла, што "следства мае звесткі пра арганізатарскую ролю дырэктара прадпрыемства ў справе пра "заказныя" таргі". Аднак падобнага абвінавачання Кныровічу выстаўлена не было.
Часам, але не вельмі часта, сябрам і сваякам Аляксандра Кныровіча дазваляюць сустрэцца з ім.
“З ім там усё добра. Выглядае добра. Чытае шмат кніг. Чакае суда”, — распавяла Еўрарадыё пасля аднаго з такіх спатканняў Аляксандра Несцерава, сяброўка Кныровіча.
Расследаванне эканамічных справаў у Беларусі рэдка займае менш за паўгода. Напрыклад, кіраўнік групы кампаній Fenox Global Group Віталь Арбузаў, затрыманы 12 красавіка, таксама дагэтуль знаходзіцца за кратамі. IT-прадпрымальнік Віктар Пракапеня правёў у ізалятары час з 18 сакавіка па 23 снежня 2015 года. А суд над сенатаркай-прадпрымальніцай Ганнай Шарэйка пачаўся праз 17 месяцаў пасля яе затрымання.