Справу журналіста, футбаліста і палітвязня Івуліна перадалі ў пракуратуру
Справу журналіста, футбаліста і палітвязня Аляксандра Івуліна перадалі ў пракуратуру, паведамляе Беларускі фонд спартыўнай салідарнасці. Гэта можа сведчыць пра тое, што неўзабаве пачнецца суд.
Івулін знаходзіцца за кратамі з пачатку чэрвеня 2021 года. Спачатку ён адбыў 30 сутак адміністрацыйнага арышту (пакаралі за нібыта бел-чырвона-белы сцяг на акне). Але на волю не выпусцілі — узялі пад варту на два месяцы (пасля тэрмін працягвалі), перавялі ў СІЗА № 1 у Мінску. У ліпені Аляксандру Івуліну выставілі абвінавачванне па артыкуле "Арганізацыя групавых дзеянняў, што груба парушаюць грамадскі парадак". Яму пагражае да 4 гадоў пазбаўлення волі. Праваабарончая супольнасць Беларусі прызнала Івуліна палітвязнем.
Івулін быў футбалістам "Крумкачоў", якія выступалі ў першай лізе чэмпіянату Беларусі (а цяпер у стыкавых матчах пазмагаюцца за выхад у эліту). Незадоўга да свайго арышту ён забіў першы гол у складзе каманды (на відэа).
