Стральба ў Тэхасе: у гандлёвым цэнтры забілі васьмярых чалавек
Паводле слоў сведкаў, узброены чалавек без разбору страляў у пакупнікоў гандлёвага цэнтра / Reuters
Узброены чалавек застрэліў васьмярых у гандлёвым цэнтры амерыканскага штата Тэхас, піша ВВС. Паводле дадзеных выдання, узрост ахвяраў — ад 5 да 51 года.
Той, хто адкрыў агонь па людзях, таксама быў застрэлены.
Паводле слоў сведкаў, узброены чалавек без разбору страляў у наведнікаў гандлёвага цэнтра. На відэа з месца здарэння бачна, як людзі бягуць да аўтастаянкі, каб там схавацца ад серыі стрэлаў.
Насельніцтва горада Ален, у якім адбылася стральба — усяго 105 тыс. чалавек. Большасці людзей ва ўзросце 21 года і больш дазволена насіць пісталет без ліцэнзіі. Выключэнне складаюць людзі, якія раней былі асуджаныя. Таксама ёсць некалькі абмежаванняў на валоданне вінтоўкамі і драбавікамі.
Паводле дадзеных Архіва гвалту з ужываннем агнявой зброі, у ЗША сёлета адбылося не меней за 198 масавых расстрэлаў. “Масавы расстрэл” значыць, што былі забіты ці паранены чацвёра — ці больш. Гэта максімальны паказчык з 2016 года, заўважае ВВС.
