У Беларусі адправілі ў калонію анкахворага, які прыехаў у краіну на абследаванне
Анатоль Пугач / t.me/viasna96
У Баранавічах адправілі ў калонію анкахворага 28-гадовага Анатоля Пугача. Яго затрымалі 13 снежня, на наступны дзень пасля вяртання з Польшчы. У Беларусь ён прыехаў на абследванне, бо за мяжой у яго вынайшлі анкалагічнае захворванне, паведамляюць праваабаронцы “Вясны”.
Хлопца абвінавацілі ў абразе Лукашэнкі паводле ч. 1 арт. 368 КК. Справу разглядала суддзя Аксана Літвінчык.
У матэрыялах абвінавачання гаворыцца, што хлопец “пасля прагляду відэазапісаў, якія змяшчалі абразу прэзідэнта, размясціў на сваёй старонцы ў сацыяльнай сетцы ўказаныя відэазапісы, тым самым прынізіў гонар і годнасць Аляксандра Лукашэнкі”.
Суд прызначыў Пугачу пакаранне ў выглядзе пазбаўлення волі на тэрмін адзін год з адбываннем пакарання ў папраўчай калоніі ва ўмовах агульнага рэжыму.
