У Браслаўскім раёне знайшлі рэдкія грыбы — чорныя лісічкі
Чорныя лісічкі / braslav-star.by
У Браслаўскім раёне Віцебскай вобласці выяўлена верагоднае месца вырастання рэдкіх грыбоў — чорных лісічак, піша braslav-star.by са спасылкай на дырэктара рэспубліканскага гідралагічнага заказніка "Рычы" Аляксандра Молакава. Паводле яго слоў, прадстаўнікі заказніка праводзілі чарговы рэйд па месцах, дзе раней былі заўважаны рэдкія віды раслін, і ў тым раёне зрабілі незвычайную знаходку. Яны заўважылі некалькі лісічак незвычайнай афарбоўкі — цёмнай. Было пацверджана, што грыб вельмі падобны на вараночнік ражкападобны (Craterellus cornucopioides). Для Беларусі гэта рэдкасць.
Цяпер выяўленае месца ўзята пад кантроль і будзе далей вывучацца на прадмет наяўнасці згаданага віду.
У верасні чорныя лісічкі знайшлі ў Сенненскім раёне той жа Віцебскай вобласці.
