У Фонд сацабароны будуць збіраць грошы з тых, хто сядзіць у ЛПП і на "зонах"

16 снежня дэпутаты Палаты прадстаўнікоў прынялі ў першым чытанні законапраект "аб унёсках у бюджэт дзяржаўнага пазабюджэтнага фонду сацыяльнай абароны насельніцтва Рэспублікі Беларусь".

Чалец Пастаяннай камісіі па працы і сацыяльных пытаннях Валерый Стральчонак патлумачыў неабходнасць прыняцця закона тым, што існуюць шмат нарматыўна-прававых актаў у гэтай сферы і іх неабходна сістэматызаваць.

Ён заявіў, што прапануецца ўвесці новую катэгорыю плацельшчыкаў — гэта арганізацыі, якія забяспечвалі грашыма вайскоўцаў тэрміновай службы. У новым законе будзе замацаваная і такая катэгорыя, як самазанятыя грамадзяне.

"Таксама да працуючых будуць адносіцца асобы, якія знаходзяцца ў лячэбна-працоўных прафілакторыях, якія знаходзяцца ў месцах пазбаўлення волі, калі яны выконваюць аплачваную працу", — перадае БЕЛТА словы Стральчонка.

Змены закрануць і аднаўленне парушаных па ўважлівых прычынах тэрмінаў звароту па дапамогу — як аднаразовую, так і штомесячную. "Раней гэты тэрмін складаў паўгода. Цяпер будзе ўводзіцца абмежаванне па тэрмінах за тры гады перад зваротам, дапамогі будуць прызначацца не з моманту звароту, а з даты наступлення права на гэтую дапамогу", — удакладніў дэпутат.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.