У Гомельскай вобласці ўлады абвясцілі надзвычайную сітуацыю
Наступствы ўрагану ў Калінкавічах / t.me/kalinkovichi_news_official
Надзвычайную сітуацыю абвясцілі ўлады ў Гомельскай вобласці. З адпаведнай заявай выступіў кіраўнік вобласці Іван Крупко.
Ён адзначыў, што вобласць сур'ёзна пацярпела ад урагану, які прайшоў па рэгіёне 14 ліпеня. Не абышлося і без чалавечых ахвяраў.
На раніцу панядзелка без электрычнасці застаюцца Мазыр, Ельск, Калінкавічы, Лельчыцы і Нароўля. Парушана электразабеспячэнне каля 1150 населеных пунктаў. Таму быў сфармаваны аператыўны штаб.
"Спецыяльныя службы: энергетыкі, ратавальнікі, леснікі, ЖКГ, міліцыя працягваюць працаваць у кругласутачным рэжыме. Ствараюцца дадатковыя брыгады па расчыстцы лясных завалаў для максімальна хутчэйшага доступу энергетыкам да ЛЭП", — распавёў Іван Крупко.
Тым часам у Мазыры, як паведамляла Еўрарадыё, жыхары засталіся не толькі без электрычнасці, але і без вады: дастаўку вады ў кватэры абяцаюць аднавіць, калі вернецца падача электрычнасці. Улады паведамілі пра дзве машыны з пітной вадой на ўвесь статысячны горад.
