У Літвы няма інфармацыі пра магчымыя правакацыі вагнераўцаў на мяжы

На цяперашні час у Літвы няма інфармацыі пра магчымыя правакацыі на мяжы з боку наймітаў ПВК "Вагнер", дыслакаваных у Беларусі. Пра гэта заяўляе прэзідэнт краіны Гітанас Наўседа, піша Delfi.

Пры гэтым ён удакладняе, што прысутнасць вагнераўцаў сведчыць, што такія правакацыі могуць быць учыненыя як супраць Польшчы, так і супраць Літвы і Латвіі. "Таму мы будзем сачыць за іх дзеяннямі, мы ўзмацнілі свае разведвальныя магчымасці, прысвечаныя гэтай праблеме, будзем сачыць за сітуацыяй і будзем гатовыя рэагаваць у выпадку неабходнасці", — падкрэслівае Наўседа.

Пагрозу правакацый з боку вагнераўцаў ён ацэньвае як сур'ёзную. Пры неабходнасці, па словах Наўседы, на мяжы будзе выкарыстанае літоўскае войска.

"Няма ніякіх перашкод для таго, каб літоўскае войска прыйшло на дапамогу памежнікам, і гэта абавязкова будзе зроблена", — дадае прэзідэнт Літвы.

Як паведамляла Еўрарадыё, Літва, Польшча і Латвія могуць прыняць сумесную пастанову аб закрыцці мяжы з Беларуссю ў выпадку правакацый з боку вагнераўцаў. Пра гэта заявіў намеснік міністра ўнутраных спраў Літвы Арнольдас Абрамавічус.

Суседзі Беларусі сталі актыўна ўзмацняць свае межы пасля прыбыцця вагнераўцаў у нашу краіну. Напярэдадні каля мяжы з Беларуссю заўважылі польскіх снайпераў.