У Лос-Анджэлесе пажар стаў прычынай эвакуацыі 30 тысяч чалавек

У Лос-Анджэлесе лясны пажар стаў прычынай эвакуацыі 30 тысяч чалавек, паведамляе Reuters. Улады аб'явілі рэжым надзвычайнай сітуацыі. З агнём змагаюцца з дапамогай авіяцыі.

Пажару папярэднічала працяглае засушлівае надвор'е. Агонь хутка распаўсюдзіўся ў аўторак у раёне Пасіфік-Палісэйдс паміж прыбярэжнымі паселішчамі Санта-Моніка і Малібу праз моцны вецер, гарэлі і жылыя дамы. Плошчу пажару ацэньвалі на амаль 1200 гектараў. На дарогах утвараліся заторы з-за вялізнай колькасці аўтамабіляў. Людзям даводзілася пакідаць машыны і сыходзіць у бяспечнае месца пешшу.

Вядома, што ў раёне пажару жывуць некаторыя галівудскія зоркі. У зону эвакуацыі трапіла рэзідэнцыя віцэ-прэзідэнта ЗША Камалы Харыс.

Інфармацыі пра пацярпелых няма.