У магілёўскага пенсіянера знайшлі пісталет, абрэз і патроны
Следчы камітэт пачаў крымінальную справу на 63-гадовага пенсіянера: яго падазраюць у незаконным захоўванні зброі.
6 лістапада праваахоўнікі знайшлі ў хляве і гаражы прыватнага дома ў вёсцы Канстанцінаўка Магілёўскага раёна абрэз вінтоўкі сістэмы "Маўзер" узору 1898 года, пісталет сістэмы Токарава "ТТ" узору 1933 года, а таксама ствол да такога ж пісталета. Акрамя таго, пенсіянер захоўваў 42 патроны рознага калібру — ад 7,62 мм да 9 мм.
Эксперты выявілі, што гэтыя прадметы з'яўляюцца агнястрэльнай зброяй, складовай часткай да яе, а таксама боепрыпасамі, прыдатнымі для стральбы.
Праваахоўнікі затрымалі мужчыну, цяпер з ім працуюць следчыя.
