У магілёўскай калоніі памёр 22-гадовы палітзняволены Дзмітрый Шлетгаўэр
Дзмітрый Шлетгаўэр / t.me/viasna96
У магілёўскай калоніі №15 памёр 22-гадовы палітзняволены Дзмітрый Шлетгаўэр, паведамляе праваабарончы цэнтр "Вясна". Паводле папярэдняй інфармацыі, гэта адбылося 11 кастрычніка. Гэта сёмая смерць палітвязня за кратамі ў Беларусі.
Шлетгаўэра гэтым летам асудзілі на 12 гадоў калоніі ўзмоцненага рэжыму. Яго вінавацілі ў "шпіянажы" і "садзейнічанні экстрэмісцкай дзейнасці".
Пакуль ішоў суд над ім, у Дзмітрыя нарадзілася дзіця. Як адзначаюць праваабаронцы, палітвязень прабыў у калоніі менш за месяц. Дакладная прычына смерці невядомая.
Паведамляецца, што Шлетгаўэр нарадзіўся ў расійскім Слаўгарадзе і меў расійскае грамадзянства. У 2018-м ён атрымаў від на жыхарства ў Беларусі. Хлопец працаваў на прадпрыемстве па вытворчасці палімернай прадукцыі і ўпакоўкі ў Камянцы.
