У Магілёве з "выбараў" нечакана знялася дэпутатка Палаты прадстаўнікоў
Наталля Тарасенка / sb.by
У Магілёве з "выбараў" нечакана знялася дзеючая дэпутатка Палаты прадстаўнікоў Наталля Тарасенка, піша MAYDAY.
Акруговая выбарчая камісія Магілёўскай сельскай выбарчай акругі №88 ухвалілая яе заяўку на зняцце з "выбараў". Прычына такога кроку і дата прыняцця пастановы не называюцца.
Праваабаронцы звяртаюць увагу, што яшчэ на мінулым тыдні ў "Магілёўскіх ведамасцях" публікавалася перадвыбарная праграма Тарасенка, а на працягу датэрміновага галасавання ў яе было прызначана некалькі агітацыйных сустрэчаў.
Цяпер у акрузе №88 засталася толькі адна кандыдатка — дырэктарка мяжысецкай школы Лілія Мельнікава. Раней яна падпарадкоўвалася Наталлі Тарасенка, бо тая да выбараў 2019 года ўзначальвала аддзел адукацыі Магілёўскага райвыканкама. У Палаце прадстаўнікоў Тарасенка ўваходзіць у пастаянную камісію па правах чалавека, нацыянальных адносінах і сродках масавай інфармацыі. Яна цалкам падтрымлівала курс Аляксандра Лукашэнкі.
Напярэдадні стала вядома пра зняцце з "выбараў" яшчэ аднаго чыноўніка — у Докшыцах.
