У Мінгарвыканкаме новы старшыня — Анатоль Сівак
![У Мінгарвыканкаме новы старшыня — Анатоль Сівак](/sites/default/files/styles/gallery_main/public/2023-08/sivak_0.jpg.webp?itok=uuJPtzS5)
У Мінгарвыканкаме новы старшыня — Анатоль Сівак. 24 лістапада яго прызначыў на гэтую пасаду Аляксандр Лукашэнка, паведамляе прэс-служба прэзідэнта. Кіраўнік краіны таксама анансаваў сустрэчу з актывам сталіцы, якая павінна адбыцца неўзабаве.
56-гадовы Анатоль Сівак паходзіць з Гомельшчыны. У свой час ён скончыў Беларускі інстытут інжынераў чыгуначнага транспарту і пасля гэтага працаваў на Беларускай чыгунцы ў Дарбудмантажтрэсце. Быў намеснікам начальніка Беларускай чыгункі, памочнікам прэзідэнта — галоўным інспектарам па г. Мінску. У 2009 годзе стаў начальнікам Белчыгункі, а ў 2012 годзе — міністрам транспарту і камунікацыяў. На гэтай пасадзе знаходзіўся дагэтуль.
Невядома, чым цяпер будзе займацца ўжо былы старшыня Мінгарвыканкама Андрэй Шорац. Перад выходнымі Лукашэнка склікаў нараду аб павышэнні эфектыўнасці будаўнічага комплексу і на ёй выказаў незадаволенасць працай Шорца. Галоўнай прэтэнзіяй былі схемы з масавым набыццём і перапродажам кватэраў ад камунальнага забудоўніка. Цяпер чыноўнік звольнены.
Менавіта за чатыры гады пад кіраўніцтвам Андрэя Шорца ў Мінску шырока разгарнулася будаўніцтва буйных аб’ектаў з “ушчыльненнем”, супраць якога пратэстуюць жыхары сталіцы. Але ж пры гэтым у Мінску здолелі рэфармаваць сістэму ЖКГ і атрымаць эканомію для бюджэту, з’явілася болей фаст-фудаў, крамаў вопраткі міжнародных сетак.