У наваполацкай калоніі прыбралі ўсе кнігі на беларускай і кітайскай мовах
Кнігі пад забаронай (ілюстрацыйнае фота) / pixabay.com
У наваполацкай папраўчай калоніі № 1 прыбралі ўсе кнігі на беларускай мове. Пра гэта праваабаронцам распавёў былы палітвязень, які некалькі месяцаў там знаходзіўся. Паводле яго слоў, "зачыстка" бібліятэкі пачалася восенню мінулага года. "Цяпер з бібліятэкі вынялі ўсе беларускія творы... — расказвае экс-палітзяволены. — Палітычным нельга чытаць Алексіевіч, напрыклад. Прыбралі Купалу, Караткевіча, Коласа".
Беларускамоўнымі творамі, аднак, адміністрацыя калоніі не абмежавалася. Таксама з бібліятэкі забралі кнігі на замежных мовах — англійскай, польскай, літоўскай і нават кітайскай. На пытанне, чаму "рэпрэсавалі" кнігі на кітайскай мове, супрацоўнік адміністрацыі сказаў наступнае: "Сёння сябры, заўтра — ворагі".
У мясцовай бібліятэцы засталіся толькі рускамоўныя выданні.
Вядома, што ў ПК-1 знаходзіцца 106 палітвязняў. Самы вядомы з іх — Віктар Бабарыка.
