У Смалявіцкім раёне пад лёд праваліліся двое рыбакоў, адзін загінуў

У Смалявіцкім раёне двое рыбакоў праваліліся пад лёд, адзін з іх загінуў. Пра гэта БЕЛТА паведамляе са спасылкай на Мінскае абласное ўпраўленне МНС. Здарэнне адбылося сёння, 13 студзеня, на Пятровіцкім вадасховішчы. Выклік паступіў у дзяжурную частку ў 12.12. На момант прыбыцця выратавальнікаў аднаму з мужчын дапамаглі выбрацца з вады людзі, якія былі побач. Другога дасталі з вады супрацоўнікі МНС, але мужчына быў ужо мёртвы.

Дзень таму падобны інцыдэнт адбыўся ў Рагачоўскім раёне: каля пасёлка Беліцк праваліўся пад лёд і загінуў пенсіянер 1955 года нараджэння. Ён таксама прыйшоў павудзіць рыбу.

Марознае надвор’е ўсталявалася ў Беларусі ўсяго некалькі дзён таму: выратавальнікі нагадваюць, што выходзіць на слабы лёд пакуль яшчэ небяспечна.