Вядомага кікбаксёра Аляксея Кудзіна этапавалі ў шклоўскую калонію

Шматразовага чэмпіёна свету па тайскім боксе і кікбоксінгу Аляксея Кудзіна этапавалі ў шклоўскую калонію, паведамляе Sputnik са спасылкай на адваката Марыну Крумкач.

"Ён накіраваны ў Шклоўскую калонію. Пакуль няма іншай інфармацыі, да яго на спатканне збіраецца жонка", — сказала яна.

Да суда і пасля прысуду Кудзін знаходзіўся ў СІЗА ў Жодзіне. У жніўні 2021 года яго асудзілі на два з паловай гады калоніі агульнага рэжыму. Спартоўца прызналі вінаватым у супраціве супрацоўнікам міліцыі падчас разгону акцыі пратэсту ў жніўні 2020 года. Кудзін у судзе казаў, што гэта была самаабарона. Ён прызнаны палітвязнем.

Кудзін спрабаваў унікнуць крымінальнага пераследу — выехаў у Расію. Аднак яго затрымалі пад Масквой, а затым выдалі ў Беларусь.