Вялікабрытанія пацвердзіла адпраўку салдатаў на польска-беларускую мяжу

Лондан афіцыйна пацвердзіў адпраўку брытанскіх салдатаў на польска-беларускую мяжу, паведамляе Міністэрства абароны Вялікабрытаніі ў Твітэры.

"Невялікая група брытанскіх вайскоўцаў пасля дамоўленасці з урадам Польшчы была накіраваная, каб вывучаць якую інжынерную падтрымку мы можам аказаць, каб вырашыць сітуацыю на мяжы з Беларуссю", — гаворыцца ў заяве брытанскага абароннага ведамства.

Раней міністр нацыянальнай абароны Польшчы Марыюш Блашчак расказаў, што брытанскія вайскоўцы дапамогуць Польшчы ўмацаваць агароджу на мяжы з Беларуссю.

Як паведамляла Еўрарадыё, пра тое, што Польшчы трэба аказаць дапамогу ў абароне знешняй мяжы Еўрасаюза, заявіў выканаўца абавязкаў міністра ўнутраных спраў ФРГ Хорст Зеехофер. Ён таксама заклікаў краіны ЕС да згуртаванасці ў гэтым пытанні. Сітуацыю на мяжы Беларусі з краінамі ЕС і міграцыйны крызіс будзе абмяркоўвацца ў пятніцу ў Парыжы на сустрэчы кіраўнікоў МЗС і Мінабароны Францыі і Расіі.

Крызіс на мяжы Беларусі з краінамі ЕС рэзка абвастрыўся 8 лістапада. Некалькі тысяч чалавек прыйшлі да польскай мяжы ў надзеі прарвацца праз тэрыторыю Польшчы далей у Нямеччыну. Яны разбілі лагер у лесе і перыядычна робяць спробы прарвацца праз мяжу.