"Выдаванню не падлягае". Заводы ў Оршы пачалі працаваць на расійскую абаронку

14/02/2024 - 12:00

Аршанскія заводы працуюць на расійскую абаронку

Аршанскія заводы працуюць на расійскую абаронку / @rubanau_collage

У двух напаўмёртвых заводаў у Оршы — горадзе на паўночным усходзе Беларусі, каля самай мяжы з Расіяй, у 2022 годзе раптам пачалося новае жыццё. Прадпрыемствы, якія спецыялізаваліся на вытворчасці металічных дэталяў і інструментаў, тэрмінова правялі рамонты, закупілі новыя станкі і актыўна шукаюць новых работнікаў.

Аб маштабах "пашырэння" можна меркаваць, напрыклад, па тым, што на "Лягмашы", спісачная колькасць супрацоўнікаў якога 490 чалавек, адкрыліся вакансіі на 46 прафесій і пасадаў. А на Аршанскім інструментальным заводзе патрабуюцца работнікі па 21-й спецыяльнасці. Прычым заробкі, якія там прапануюць патэнцыйным супрацоўнікам, значна вышэйшыя, чым сярэднія па Віцебскай вобласці.

Чым заводы абавязаныя такому дзівоснаму перараджэнню?

Паводле інфармацыі крыніцы Еўрарадыё, абодва прадпрыемствы пасля пачатку поўнамаштабнага ўварвання Расіі ва Украіну пачалі працаваць на расійскую абаронку. Яны вырабляюць карпусы снарадаў для расійскай арміі.

Карэспандэнт Еўрарадыё паспрабаваў уладкавацца на "Легмаш" і Аршанскі інструментальны завод. І вось што ў яго атрымалася.

"Вы прыязджайце паразмаўляць ужывую"

Намеснік дырэктара па персаналу і ідэалагічнай працы завода "Легмаш" Аляксандр Кароткін пацвердзіў, што заробкі на вытворчасці высокія:

— На пачатку будзе тысячы дзве рублёў, можа нават і больш, потым, калі перавучыцца, напрыклад, на аператара, то можна і тры, і тры з паловай тысячы зарабляць. Графік зменны: па 12 гадзін, два праз два.

Сярэдні заробак па Віцебскай вобласці ў снежні 2023 года склаў 1860 рублёў. А тут — ад дзвюх тысяч. Някепска для прадпрыемства з доўгім спісам неліквіду.

Кароткін расказаў, што на змене прыйдзецца выточваць дэталі вагой больш за 8 кг. Пасля пытання, пра якія дэталі ідзе гаворка, ідэолаг сумеўся:

— Нуу, дэталі. Дэталі і дэталі. Для нафтагазавай прамысловасці, для труб, для свідравін. Вы прыязджайце паразмаўляць ужывую.

Падчас размовы з супрацоўніцай аддзела кадраў "Легмаша" журналіст спытаў у лоб: "А ў вас праўда вырабляюць боепрыпасы для расійскага войска?"

— Малады чалавек, гэта камерцыйная таямніца, і выдаванню яна не падлягае, — адказала яна. — Калі вас цікавіць вакансія — прыходзьце з усімі сваімі дакументамі і пытаннямі да кіраўніка, які будзе з вамі гаварыць.

Так звычайна і расказваюць пра сваю прадукцыю на прадпрыемстве, якое спецыялізуецца на дэталях для швейных машынак і чыгунным посудзе.

"Старонняму чалавеку мы зарплату не агучваем"

Прыехаць і пагаманіць асабіста ўвесь час прапануюць і на Аршанскім інструментальным заводзе. Маўляў, вельмі шмат людзей прыходзіць уладкоўвацца і размаўляць па тэлефоне часу няма. У аддзеле кадраў з нашым журналістам размаўлялі на крыху падвышаных танах.

— Графік зменаў варыятыўны. Ёсць і першая, і другая, і трэцяя. Калі вы хочаце даведацца пра грошы, то старонняму чалавеку мы зарплату не агучваем. Вам трэба прыехаць.

Супрацоўніца таксама расказала, што на прадпрыемстве давядзецца займацца вытворчасцю дэталяў:

— Я не ведаю, якія дэталі. Магчыма, інструменты або дэталі для зборкі трактароў. Але зборкай трактароў вы наўрад ці будзеце займацца. Давайце вы лепш прыедзеце і будзеце тут мне нервы рваць.