Жыхара Баранавічаў адправілі ў калонію за некалькі слоў пра Лукашэнку
У Беларусі толькі афіцыйна прызнаных праваабаронцамі палітвязняў паўтары тысячы / shutterstock/Fanni_2021
Жыхара Баранавічаў адправілі ў калонію за некалькі слоў пра Аляксандра Лукашэнку. Як піша "Наш край" са спасылкай на міжраённую пракуратуру, мужчыну прызналі вінаватым у тым, што ў лютым 2023-га ён распісаў некалькі сцен у пад'ездзе шматпавярховіка. У надпісах убачылі "абразу Лукашэнкі". Таксама яго прызналі вінаватым у "псаванні маёмасці".
Крымінальную справу разглядаў суд Баранавіцкага раёна і горада Баранавічы. Мужчыну асудзілі на 1 год і 6 месяцаў калоніі агульнага рэжыму.
Суды ў Беларусі за "абразу Лукашэнкі" не спыняюцца ўжо некалькі гадоў. У тых жа Баранавічах у чэрвені ў мясцовым універсітэце судзілі студэнтку за "публічную абразу Лукашэнкі". Яна атрымала два гады "хатняй хіміі".
