Зяленскі прыехаў на саміт у Малдову
Прэзідэнт Украіны Уладзімір Зяленскі і прэзідэнт Малдовы Мая Санду / newsmaker.md
1 чэрвеня прэзідэнт Украіны Уладзімір Зяленскі прыехаў на саміт Еўрапейскай палітычнай супольнасці ў Малдову. Ён пройдзе ў замку ў 35 кіламетрах ад Кішынёва і збярэ каля 50 прэзідэнтаў, прэм'ер-міністраў і высокапастаўленых еўрапейскіх чыноўнікаў, паведамляе newsmaker.md. Выданне называе саміт "беспрэцэдэнтнай падзеяй у гісторыі краіны".
Удзел Зяленскага ў саміце Еўрапейскай палітычнай супольнасці быў засакрэчаны. У чацвер украінскі прэзідэнт напісаў у Telegram, што ўжо знаходзіцца ў Малдове і паўдзельнічае ў згаданым мерапрыемстве.
"Шмат двухбаковых сустрэч, — піша Уладзімір Зяленскі. — Развіваем кааліцыю знішчальнікаў і прапануем кааліцыю "Patriot". ЕС, NATO, формула міру. Усё для абароны нашай будучыні".
