80% ад усяго, што Беларусь набрала ў доўг у 2021 годзе, — з Расіі

Астатнія грошы — ад Міжнароднага банка рэканструкцыі і развіцця (163,5 млн долараў), фонду міжнароднага развіцця АПЕК (20 млн долараў), Кітаю (14,9 млн долараў), а таксама ЕБРР і СІБ (10 млн долараў). Звяртае на сябе ўвагу нізкі ўдзел Кітаю. У прыватнасці, гэтая краіна спыніла фінансаваць будаўніцтва Нежынскага горна-ўзбагачальнага камбіната пад Любанню. Скарачэнне крэдытнай падтрымкі прывяло да запаволення гэтага праекту, якім займаецца сябар Лукашэнкі, расейскі алігарх Міхаіл Гуцарыеў.

У 2022 годзе Беларусь хоча атрымаць ад Расіі яшчэ адзін крэдыт — $3,5 млрд. Пра гэта на нарадзе пра супрацьдзеянне санкцыйным мерам у Аляксандра Лукашэнкі распавёў віцэ-прэм'ер Мікалай Снапкоў.

"На гэты момант у прапрацоўцы заключэнне новай стабілізацыйнай праграмы з Еўразійскім фондам стабілізацыі і развіцця з выдзяленнем дзяржаўнага фінансавага крэдыту Расійскай Федэрацыяй. Агульная сума запытаных сродкаў — $3,5 млрд, што дазволіць кампенсаваць выпадаючыя еўрапейскія грошы па рэфінансаванне пазыкаў", — матываваў неабходнасць крэдыту Снапкоў .