Аднаго з найбагацейшых бізнесоўцаў Гомельшчыны затрымалі за антываенныя допісы
![Пятро Старацітараў / vc.com ](/sites/default/files/styles/gallery_main/public/2023-08/staracitarau-0902.jpg.webp?itok=-_TQELWq)
Пятро Старацітараў / vc.com
Сілавікі затрымалі за антываенныя допісы Пятра Старацітарава — аднаго з найбагацейшых прадпрымальнікаў Гомельшчыны, піша "Наша Ніва". Яму 65 гадоў, ён жыве ў Мазыры.
У савецкі час Старацітараў вучыўся ва ўкраінскім Крывым Рогу, працаваў у "Мазырпрамбудзе", у 1992 годзе разам з сябрамі стварыў кампанію "Лотас", дзе дагэтуль з'яўляецца саўладальнікам.
Кампанія пачала з вытворчасці мэблі, а цяпер займаецца жалезабетоннымі канструкцыямі, бетоннымі блокамі, вокнамі і дзвярыма, а таксама мае ўласны кар'ер каля Мазыра і ажыццяўляе перавозкі па Беларусі і замежжы.
"Лотас" мае два замежныя філіялы — у Навазыбкаве і каля Масквы.
Старацітараў атрымліваў граматы-падзякі ад выканкама, уваходзіў у топы бізнесоўцаў Гомельшчыны, меў падзякі ад Праваслаўнай царквы. Праўда, у 2016-м яго затрымлівалі за "незаконную прадпрымальніцкую дзейнасць", але ўсё скончылася добра.
Цяпер яго затрымалі за антываенныя допісы ў Фэйсбуку, якія нібыта "абражалі Лукашэнку". Па словах сілавікоў, Старацітараву пагражае крымінальная справа за "распальванне варожасці" — гэта значыць, да 5 гадоў турмы.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.