Алімпійскі чэмпіён Пекіна Андрэй Арамнаў аб'явіў пра завяршэнне кар'еры
Алімпійскі чэмпіён Пекіна цяжкавагавік Андрэй Арамнаў аб'явіў пра завяршэнне сваёй кар'еры. Ён спасылаецца на стан свайго здароўя.
"Я канчаткова завязаў са спортам, — цытуе словы Арамнава by.tribuna.com. — Ужо амаль год зусім не займаюся цяжкай атлетыкай. Перада мной паўстаў выбар: ці стаць інвалідам, ці кінуць займацца спортам і перайсці на трэнерскую пасаду".
Паводле слоў спартсмена, ён заўсёды імкнуўся да рэкордаў, якія ніхто раней не ўстанаўліваў. З-за гэтага ў яго і адбылася "перагрузка арганізму", кажа Арамнаў. Ён наракае на трэнераў, якія падганялі, бо ад вынікаў "залежалі іх заробкі".
Пачаліся шматлікія траўмы. У выніку, пасля абследавання, медыкі заявілі, што з прафесійным спортам трэба заканчваць.
Андрэю Арамнаву 17 красавіка споўніцца 28 гадоў. Пасля поспеху на Алімпіядзе ў Пекіне ў 2008-м (у катэгорыі да 105 кг) ён ужо не дасягнуў новых поспехаў. Затое яго пераследавалі скандалы. У снежні 2008-га Арамнава затрымалі за кіраванне аўтамабілем у нецвярозым стане, аштрафавалі і пазбавалі правоў кіроўцы. Але праз два месяцы зноў злавілі п'яным за рулём машыны. Была распачатая крымінальная справа. Суд яго аштрафаваў, спартсмена пазбаўлялі прэзідэнцкай стыпендыі.
