Анкета кандыдата. Сяргей Гайдукевіч: Я прафесійна гатую і спяваю

1. Імя/ Імя па бацьку/ прозвішча: Гайдукевіч Сяргей Васільевіч

2. Месца нараджэння: Мінск

3. Узрост: 61 год.

4. Рост, вага: 182 см і 95 кг.

5. Сямейнае становішча (дзеці, унукі): Жонка. Сын і дачка. У сына дзьве свае дачкі, мае унучкі. І яшчэ ў дачкі дачка ёсць — яшчэ адна унучка мая.

6. Мянушка (у дзяцінстве, а, магчыма, і цяпер): У дзяцінстве, калі ездзіў ва Украіну да радні, была нейкая. Але не памятаю. А цяпер — Шэф.

7. Якімі мовамі валодае: Ну... Рускай, беларускай, лічы, нармальна. Спік енгліш. Уат кан ю сэй эбаўт Гайдукевіч?

8. Адукацыя: Дзве вышэйшыя. “Мінскае вышэйшае інжынерна-зенітнае вучылішча” і “Вайсковая акадэмія імя маршала Жукава”. Ну, і яшчэ я мэнэджар па эканоміцы, два гады вучыўся. На курсы хадзіў у 90-ых.

9. Любімы і нелюбімы прадмет у школе/універсітэце: Я заўсёды добра вучыўся. Я гуманітарый, але добра ведаю матэматыку. Але насамрэч любімыя — гісторыя, літаратура, геаграфія. Вось такія гуманітарныя прадметы. А самы складаны прадмет — начартальная геаметрыя. Ніяк не мог намаляваць самалёт з двума аднолькавымі крыламі.

10. Ацэнкі ў школе/універсітэце: Вучыўся я добра заўсёды. Цяпер унучкі ў школу ходзяць, таксама добрыя адзнакі. Адна унучка — грамадзянка Аўстрыі. Была ў мяне, я дапамагаў з матэматыкай.

11. Гадавы даход: Я падаваў дэкларацыю Там атрымалася 230 альбо 240 мільёнаў. Дакладна я не памятаю. Але гэта з улікам “Дастэра” (“Рэно Дастэр”, французскі “паркетнік”, — Еўрарадыё). У 2014 годзе я прадаў яго за 130 мільёнаў. Але я хацеў бы, каб за год было мільёнаў 400-500. Мару пра гэта. Але пакуль толькі мільёнаў 130.

12. Самая дарагая пакупка за апошні год: Аўтамабіль. “Нісан Ікс-трэйл”. Падаў “Дастэр” і купіў “Нісан”. 26 тысяч долараў.

13. Колькі разоў быў за мяжой у апошні год і ў якіх краінах: Апошні год… Амаль не быў нідзе. Лётаў у Аўстрыю. Быў у Чэхаславакіі, у Польшчы. Я раней шмат ездзіў. Мілан, Парыж, Рым. У савецкія часы Талін падабаўся. Але любімы горад, відаць, Прага. Вось гэтыя вулачкі. Шчыра. Можа, нешта адклалася, нешта спадабалася, калі я на мосце тым стаяў.

14. Марка гадзінніка: Забыў. Цяпер вось не маю, забыў. 850 еўра каштуе. (Montblanc Meisterstuck - Еўрарадыё).

15. Марка аўтамабіля: “Нісан Ікс-трэйл”.

16. Дзе адпачываў апошні раз: У Беларусі, на Нарачы. Я рыбак. Жонка заўсёды спрачаецца са мной. Кажа, трэба да дачкі ехаць. Я кажу — трэба, але пакуль Вілейку і свае Браслаўскія азёры не аб’еду… Я рыбак-фанат. Летам, зімой, вясной, восенню. Круглы год лаўлю. Мяне лічаць прафесіяналам вышэйшага класу.

17. Самая любімая кніга/апошняя прачытаная кніга: Я вельмі шмат чытаю. Вось ты закрануў самую маю любімую тэму. Перад табой чалавек, які чытае штодня. Цяпер я захапляюся фантастыкай, чытаю Лук’яненку. Усе “Дазоры” прачытаў. Чытаю і ўсё унучцы аддаю. Класікай захапляюся. Нядаўна Жорж Санд перачытваў. У мяне дома больш за 5 тысяч кніг, калі гэта табе пра нешта кажа.

18. Топ-3 фільма і самы апошні, які глядзеў: Калі чалавек можа назваць тры любімыя фільмы, значыць, ён кажа няпраўду. Шмат любімых. Ваенныя — “Бітва за Маскву”, “Вызваленне”. Меладрамы — “Падарожжа ў Амерыку” абажаю, “Красотка” галівудская. “Унесеныя ветрам” вельмі люблю. Фантастыка — “Зорныя войны”, “Армагедон” абажаю, з задавальненнем гляджу “Стар трэк”

19. Любімая музыка. Тры найлепшыя выканаўцы: Я скончыў музыкальную школу. Граю на гітары, баяне, фартэпіяна. Я сам пішу песні і толькі іх граю. Абажаю “Бітлз”, Браяна Адамса, сур’ёзных выканаўцаў я люблю, якія маюць галасы. З расійскага Карнелюка люблю. Але ён з Брэста. Шыкоўныя песні. Я сам амаль так спяваю. Я шыкоўна спяваю.

20. Любімы від спорту. Каманда, за якую балее: Што тычыцца хакея, то перад табой сядзіць знаток. Я ведаю нумары ўсіх канадцаў, якія гулялі са зборнай СССР. Эспазіта, Грэцкі. Усё па хакеі ведаю. У футболе ўсё жыццё балеў за кіеўскае “Дынама”. Цяпер — за БАТЭ. Любімага футбаліста там не скажу табе, я іх ведаю ўсіх, нехта можа пакрыўдзіцца. Апошняя гульня як скончылася… Зараз, зараз, зараз скажу… Забыў. Шчыра гавару, забыў. (БАТЭ — “Шахцёр”, Салігорск — 1:1, матч прайшоў за тры дні да размовы з Гайдукевічам, — Еўрарадыё).

21. Любімая страва і яе рэцэпт: Я вельмі добра гатую. І мая жонка ганарыцца гэтым і перад усімі хваліцца: “Сярожка, прыгатуй гэта, тое”. Больш за ўсё люблю гатаваць у духоўцы мяса. Тушу мяса. Але ўвогуле шыкоўна гатую дранікі. Гэта зусім. Хто ні прыязджае да мяне, таму гатую. Боршч цудоўна гатую. Шмат якія жанчыны і побач не стаялі.

22. Добрая звычка: Я добры проста.

23. Кепская звычка: Палю. Але я адстойваю правы людзей, якія паляць, нават на тэлебачанні з гэтай нагоды быў. Усе вялікія людзі палілі. Пачынаючы ад Хемінгуэя.

24. Любімая цытата палітыка: Цытата? Я ж не адмарожаны, я нармальны чалавек. Цытаты да мяне прыходзяць свае ўласныя. Цытаты на ўсё жыццё адной няма. У аднаго адна цытата на ўсе месцы падыходзіць. Другая ў іншага. Хай мяне ўсе цытуюць.

25. Чый Крым?: Увогуле, заўсёды быў украінскім.

26. Колькі тэрмінаў на пасадзе павінен быць прэзідэнт?: Ты ведаеш, традыцыйна заўсёды лічылася, што два. Але я з гэтым не згодны. Думаю, можа быць і тры. Вось быў такі вялікі дэмакрат, у харошым сэнсе гэтага слова, Вацлаў Гавэл. Вось ён не пайшоў на трэці тэрмін. Але я думаю, што большасць грамадзян Чэхаславакіі шкадуе. Трэба ўсё ж улічваць асаблівасці кожнай краіны. Асобу ў гісторыі яшчэ ніхто не адмяняў.

27. За каго галасаваў на мінулых выбарах: За сябе. А, ты 2010 год маеш на ўвазе? Я не хадзіў.

28. Першы ўказ на пасадзе прэзідэнта: Гэта дурное пытанне. Ну як можна выдумаць першы указ? Паціху бы ўсё мяняў, шмат пытанняў. Іх дафіга! Ну, напэўна, першае, што б я зрабіў — каб не стала горш.

29. Першы візіт у якасці прэзідэнта: Не ведаю.

30. Слоган кампаніі: Гайдукевіч — моцная Беларусь!

Чытайце таксама Анкета кандыдата. Мікалай Улаховіч: Мяне ўсе называлі Дзмітрычам