АНТ — пра акцыі пратэсту: "цытадэль для адпрацоўкі штурмавых навыкаў"

19/12/2019 - 07:45

Напярэдадні 20 снежня, калі ў Санкт-Пецярбургу сустрэнуцца, каб паразмаўляць пра інтэграцыю Аляксандр Лукашэнка і Уладзімір Пуцін, на беларускіх дзяржаўных тэлеканалах выйшлі сюжэты на тэму падрыхтоўкі апазіцыяй вулічнай акцыі пратэсту ў гэты дзень у цэнтры сталіцы.

На "Беларусь 1" пераказалі папярэджанне мінскай міліцыі "аб недапушчальнасці незаконнай агітацыі і правядзення несанкцыянаваных масавых мерапрыемстваў". На сайце ГУУС напярэдадні з'явілася інфармацыя пра тое, што такое папярэджанне аб адміністрацыйнай адказнасці атрымаў адзін з лідараў аргкамітэта па стварэнні БХД Павел Севярынец. Як вядома, акцыя, пра якую апазіцыянеры праінфармавалі гарадскія ўлады, планавалася на Кастрычніцкай плошчы. Міліцыя нагадала Севярынцу, што ў Палацы Рэспублікі праходзяць навагоднія мерапрыемствы для дзяцей. Будзе падобная дабрачынная акцыя і 20-га. Таму было заяўлена, што "правядзенне несанкцыянаванага мерапрыемства ўяўляе пагрозу бяспецы дзяцей і іх бацькоў". І міліцыя збіраецца прыняць усе меры, каб бяспека для грамадзян, а сярод іх і дзяцей, была забяспечана.

Падобнае прагучала і на АНТ. Заяўлена, што апазіцыя заклікае людзей на вуліцу, "не думаючы пра бяспеку і наступствы". Былі паказаныя кадры папярэдняй антыінтэграцыйнай акцыі, калі адбылася сутычка пратэстоўцаў і сілавікоў на прыступках Палацу Рэспублікі. "Цытадэль для адпрацоўкі штурмавых навыкаў", — цытата з сюжэта.

На сайце БЕЛТА з'явіўся тэкст палітолага Аляксея Бяляева пра тое, што "апазіцыйныя сілы перадзёргваюць сэнс інтэграцыі дзеля палітычных ачкоў". А Андрэй Мукавозчык на sb.by змясціў тэкст з загалоўкам "Планы на вецер. Чаму "дэмакраты" плююць на нашу бяспеку".

Гэта можа азначаць, што ніякіх несанкцыянаваных акцый на Кастрычніцкай плошчы не дапусцяць. На карысць гэтай версіі сведчаць прэвентыўныя затрыманні актывістаў.